Laura Foraster, naua secretària generau deth Diplocat

Foto: Generalitat de Catalunya

Eth president Torra presidís eth plen der organisme que s’a amassat aguest maitin en Palai dera Generalitat

Eth president dera Generalitat, Quim Torra, qu'a presidit aguest maitin en Palai dera Generalitat eth segon plen deth Conselh de Diplomàcia Publica de Catalonha (Diplocat) dempús deth sòn restabliment. Eth 27 d'octobre deth 2017, eth Conselh de Ministres espanhòu, en aplicacion der article 155, qu'acordèc, entre d'autes mesures, era dissolucion der organisme, que demorèc en procès de supression enquiath 12 de junh deth 2018, quan eth Govèrn catalan acordèc arturar eth mandat de liquidacion deth consòrci.

Ena reünion deth Plen deth Diplocat d'aué, a on tanben a assistit eth conselhèr d'Accion Exteriora, Relacions Institucionaus e Transparéncia, Alfred Bosch, s'a aprovat eth nomentament de Laura Foraster coma naua secretària generau der organisme.

Foraster qu'ei licenciada en Administracion e Direccion d'Empreses pera UPF e en Umanitats pera UOC e a un mastèr en Estudis Europèus hèt ena Universitat KU Leuven, ath delà de formacion especifica en diplomàcia publica e en missions d'observacion electorau. Deth 2012 ath 2018 que siguec era directora executiva deth Diplocat e, preliminarament, auie exercit coma cap de Cabinet deth conselhèr de Comèrç, Torisme e Consum (2003-2006) e d'Innovacion, Universitats e Empresa (2006- 2010). Abans d'aguestes foncions, que trabalhèc en Brussèlles, en tot desvolopar diferenti trabalhs ena Comission Europèa, en Comitat des Regions, ena Delegacion deth Govèrn dera Generalitat de Catalonha deuant era Union Europèa e en Parlament Europèu.