Era Paris School of Economics ven d'acuélher aguest diuendres era prumèra activitat de Diplocat en estrangèr dempús dera sua reactivacion eth passat mes d'abriu

Eth Conselh de Diplomacia Publica de Catalonha (Diplocat), ven d'organizar aguest diuendres, 15 de noveme, amassa damb era Delegacion deth Govèrn en França e era Paris School of Economics un debat sus Cultura e preferéncies. Ena trobada i an participat catedratics e professors d'equipes de recèrca d'universitats e institucions academiques catalanes e franceses.

Aguesta jornada a significat era represa des activitats de diplomacia publica de Diplocat dehòra de Catalonha. Segon era secretària generau de Diplocat, Laura Foraster, "reactivam era diplomacia academiciana entà promòir era reflexion e era analisi sus era realitat europèa, ath madeish temps que tornam a possar aliances entre Diplocat e es organismes membres, en aguest cas es universitats catalanes, damb omològs internacionaus".

Eth debat a virat ath torn des ligams e relacions entre era cultura, era identitat, es politiques sociaus e era economia, e coma cada element se tròbe afectat pera accion des auti. Es ponéncies an tocat tèmes coma per exemple eth poder des politiques sociaus tà cambiar era societat, era relacion entre identitat culturau e caumatge, eth ròtle des mejans e eth lenguatge en tractament de tèmes com era immigracion e eth terrorisme e es sòns efèctes en torisme, o era relacion entre era identitat nacionau e es preferéncies politiques mejançant er espòrt, d'entre d'autes.

Coma exemple d'aguesta interaccion entre identitat e espòrt, Martín Fernández-Sánchez, dera Paris School of Economics, a remercat que "es trionfs deth fotbòl pòden fomentar eth sentiment d'identitat d'ua region e aguest efècte se tradusís en preferéncies politiques reaus", en referéncia ath restacament deth Futbol Club Barcelona damb Catalonha.

Era sessió qu'a començat damb era benvenguda deth delegat deth Govèrn en França, Daniel Camós, eth director de Relacions Internacionaus dera Paris School of Economics, Andrew Clark, e era secretària generau de Diplocat, Laura Foraster. Ara seguida, s'an desvolopat es sessions academiques en ua jornada de maitin e tarde damb era participacion d'academicians dera Universitat Pompeu Fabra, era Universitat Autònoma de Barcelona, era Paris School of Economics, SciencePo e et Institut for Economic Analysis de Barcelona (IAE-CSIC).