Diplocat internacionalize era Diada de Sant Jòrdi damb era campanha #BooksAndRoses e convidant periodistes estrangèrs entà Catalonha

Coma d'auti ans, Diplocat a desvolopat ath long des darrères setmanes ua campanha entà internacionalizar era Diada de Sant Jòrdi e hèr a conéisher era hèsta des libres e es ròses per tot eth mon.

En encastre deth programa de visitaires internacionaus, se convidèc a un grop d'onze periodistes estrangèrs entà passar eth 23 d'abriu en Barcelona e víuer er ambient de Sant Jòrdi en dirècte. Entre es periodistes que n'i auie d'alemands, italians, grècs, eslovèns, britanics, estonians e letons. Era directora der Institut Ramon Llull, Iolanda Batallé, les dèc era benvenguda, e pendent era sua estada poderen parlar damb escrivans, editors, libretèrs e lectors, ath delà d'èster recebudi peth president dera Generalitat, Quim Torra.

Ací que podetz veir quauqu'uns des articles qu'an publicat:

Barcellona in festa per sant Jordi (Skytg24)

Hoffnung und Sorge in Katalonien (Deutschlandfunk)

Rozes, monstrs un neatkarības ilūzija (TVNET.LV)

Catalans spreading the love with unique romantic celebration (The National)

Εκλογές στη σκιά του Καταλανικού (Kathimerini)

Kataloonias on igal aastal 23. aprillil pidupäev, milles on ühendatud üleilmne raamatute ja valentinipäev (Tallinn TV)

Prihodnost Španije po volitvah (Radio Slovenia)

Ath delà, en collaboracion damb era Agéncia Catalana de Torisme, Diplocat tornèc a activar eth web www.booksandroses.com e era campanha #BooksAndRoses enes hilats sociaus entà auferir informacion dera hèsta de Sant Jòrdi en anglés e hèr difusion des activitats restacades per tot eth mon. Enguan eth web a remassat e promocionat actes damb libres e ròses dehòra de Catalonha en un totau de 86 viles de 37 païsi.

Era campanha sage de mostrar era grana diversitat d'organizadors e eveniments que i a en món ath torn deth 23 d'abriu. En quauqui païsi s'escàmbien libres e ròses, d'auti que profiten entà hèr conferéncies e presentacions de libres, taulèrs en carrèr, concèrts e concorsi literaris. Era major part d'actes que s'amassen ena Euròpa Occidentau e en continent american.

En 2019 que cau remercar, pera nauetat, un acte en carrèr organizat pera oficina d'Accion en Seol (Corèa deth Sud), damb libres d'autors catalans; un acte organizat per prumèr viatge peth Casal Català de Polonha en Varsòvia; e un acte organizat amassa en Siracusa (Sicília) e Alessandria (Piemont) pes ajuntaments d'aguestes viles italianes, en collaboracion damb era associacion empresariau Confcommercio, consistent en auferir ròses coma present se se crompauen libres d'autors locaus e se mencionaue eth ligam damb era tradicion catalana.