Eth Plen de Diplocat apròve eth Plan de Trabalh 2020

El Ple de Diplocat aprova el Pla de Treball 2020

Includís era monitorizacion de mèdias internacionaus, era promocion de Sant Jòrdi en Naua Yòrk e convidar youtubers tath Concors de Castèths, entre d'auti

Aguest maitin s'a hèt ena Sala Torres Garcia deth Palai dera Generalitat eth segon Plen annau deth Conselh de Diplomacia Publica de Catalonha (Diplocat), entestat peth president dera Generalitat, Quim Torra, ath quau tanben a assistit eth conselhèr d'Accion Exteriora, Relacions Institucionaus e Transparència, Alfred Bosch. Pendent era amassada s'a aprovat eth Plan de Trabalh 2020, qu'a estat presentat pera secretària generau de Diplocat, Laura Foraster.

Tad açò qu'ei ad aguest plan de trabalh, Laura Foraster n'a remercat quauques accions, coma eth rapòrt sus era presència de Catalonha enes mejans de comunicacion internacionaus; ua visita entà Portugal tà estudiar modèls de bones practiques sindicaus e politiques sociaus de succès; era organizacion d'un seminari sus eth dialòg entre cultures e religions, e un aute sus eth ròtle der espòrt coma airina d'inclusion sociau; diuèrsi programes de visitaires internacionaus, damb un que vire ath torn de youtubers pendent eth Concors de Castèths de Tarragona; era campanha de Books & Roses tà Sant Jòrdi, damb especiau enfasi en Naua Yòrk; es debats deth Hilat MDAE Alumni; e eth programa de borses en relacions internacionaus, qu'artenherà era 37au edicion. Foraster tanben a anonciat eth desvolopament d'un plan d'internacionalizacion adreçat ath mon locau.

En discors de conclusion, eth president dera Generalitat, Quim Torra, a felicitat Diplocat peth trabalh hèt e l'a encoratjat "a seguir arrefortint era defensa dera democràcia e es drets umans". Eth president tanben a hèt referéncia ath rapòrt sus era imatge internacionau de Catalonha, presentat recentament per Diplocat, "perque un país ei un territòri e es sòns ciutadans, mès tanben coma mos ven de dehòra". D'un aute costat, eth conselhèr Alfred Bosch a assegurat que "se volem èster competitius e auer preséncia en mon, eth trabalh de projeccion exteriora que hè Diplocat, en tot implicar era societat civiu, ei fòrça necessari". Eth conselhèr tanben a hèt referéncia ath rapòrt a on Catalonha trè ua nòta globau de 7,3 e a encoratjat a toti a "seguir trabalhant per aguesta imatge positiva de Catalonha en mon".