Conselhèr Bosch: "Era societat catalana ei ua societat dubèrta ar exterior e eth govèrn l’a d’acompanhar"

Eth conselhèr d'Accion Exteriora, Relacions Institucionaus e Transparéncia , Alfred Bosch, a presidit aguesta tarde er acte de graduacion dera 5au edicion deth Mastèr Executiu en Diplomàcia e Accion Exteriora (MDAE) e eth liurament de diplòmes as graduats. En acte tanben i a participat era secretària generau de Diplocat, Laura Foraster; eth catedratic de Sciéncia Politica ena Universitat de Princeton e director deth Mastèr, Carles Boix; eth director der Institut Barcelona d'Estudis Internacionaus (IBEI), Jacint Jordana; e era sosdirectora generau de Recèrca e Formacion en Nauta Direccion, Eulàlia Pla.

Laura Foraster a remercat era motivacion de Diplocat entà "preparar ath personal des administracions publiques catalanes entà que contribuïsque a qu'aguest país age votz pròpia en mon e òbre damb professionalitat, rigor e responsabilitat en moment de desplegar era accion exteriora de Catalonha" damb "airines pròpies des relacions internacionaus deth sègle XXI".

Peth sòn costat, eth conselhèr Bosch a encoratjat a toti es estudiants deth mastèr a "participar ena projeccion exteriora de Catalonha" pr'amor que "era societat catalana ei ua societat plan dubèrta ar exterior e nosati l'auem d'acompanhar, ei ua obligacion deth Govèrn pr'amor que resulte en benestar dera ciutadanetat".

Coma director deth mastèr, Carles Boix s'a adreçat especiauments as naui graduats entà indicar-les qu'er objectiu non a estat solaments neurir-les d'informacion e coneishences, senon dar-les airines "tà refortir era sua vocacion de servici", e a hèt ua crida ara administracion entà plaçar aguest nau talent "ath servici dera accion exteriora dera administracion".

En nòm de toti es estudiants, Cinta Farnós a adreçat uns mots d'arregraïment as responsables deth mastèr e a avalorat que "mos emportam d'aguest mastèr era idèa fonamentau qu'es valors basics, es valors etics, democratics e de justícia son essenciaus tà desvolopar ua bona diplomàcia publica e poder auer ua votz en mon".

Eth Mastèr Executiu en Diplomàcia e Accion exteriora ei organizat peth Conselh de Diplomàcia Publica de Catalonha (Diplocat), damb era collaboracion deth Departament d'Accion exteriora, Relacions Institucionaus e Transparéncia, era Escòla d'Administracion Publica de Catalonha (EAPC) e er Institut Barcelona d'Estudis Internacionaus (IBEI).

En aguesta 5au edicion s'an graduat 16 trabalhadors des administracions publiques de Catalonha e en totau des cinc edicions ja son lèu 100 es estudiants graduats, qu'aucupen lòcs de trabalh connectadi damb es relacions internacionaus ena Generalitat de Catalonha, es deputacions e es administracions locaus.

Formacion en accion exteriora

Eth MDAE ei un programa formatiu interdisciplinari e innovador que combine coneishences en sector dera economia, deth dret internacionau e des politiques europèes damb abiletats transversaus com era comunicacion, era psicologia, era negociacion o era etica. Aguest programa qu'ei adreçat ath personau des administracions publiques de Catalonha damb experiéncia internacionau damb er objectiu de milhorar es capacitats des institucions catalanes en matèria d'accion exteriora.

Eth Mastèr qu'ei dirigit peth professor Carles Boix, doctor en Sciéncies Politiques, mastèr en Administracion Publica pera Universitat de Harvard e catedratic de Sciéncia Politica e Ahèrs Publics ena Universitat de Princenton.