Diplocat collabòre damb era entitat Foreign Friends of Catalonia entà hèr que mès de 250 estrangèrs visquen era hèsta des libres e es ròses en dirècte

Pendent quate dies e en tot coïncidir damb Sant Jordi, 250 familhes des comarques gironines dauriràn es pòrtes de sa casa a politics, academics, artistes, jornalistes e estudiants de catalan de diferenti païsi deth mon. Aguesta ei era idèa que i a darrèr de Catalonia Open Doors, un projècte liderat pera associacion Foreign Friends of Catalonia e que compde damb eth sosten de Diplocat e der Ajuntament, era Deputacion e era Cramba de Comèrç de Girona.

Ena presentacion que s'a hèt aué tara premsa, era coordinadora e fondadora de Foreign Friends of Catalonia, Pat Vila, a explicat qu'era tòca ei que "es participaires cauciguen eth territòri, coneishen qui èm e es nòstes tradicions, e qu'ara fin se creen uns ligams que les convertisquen en ambaishadors de Catalonha". Tanben a anonciat que s'era iniciatiua a un succès, en futur se poderie agranir ath delà des comarques gironines e quitament exportar ar estrangèr.

Martí Estruch, director de Comunicacion e Premsa de Diplocat, a parlat d'aguest projècte coma d'un "exemple perfècte de diplomacia publica de proximitat" e a dit que Diplocat hè ans que trabalhe entara internacionalizacion dera Diada de Sant Jòrdi, "ua hèsta unica qu'ei perfècta entà mostrar Catalonha ath mon". Ua des manères de collaborar de Diplocat serà damb era invitacion d'un grop de jornalistes estrangèrs entà que participen deth Catalonia Open Doors.

Tant era bailessa de Girona, Marta Madrenas, coma era representanta dera Deputacion, Àngels Planas, e eth dera Cramba de Comèrç, Joan Ribas, s'an mostrat satisfèti de poder collaborar damb era iniciatiua e hèr a agranir eth hilat d'"ambaishadors de Catalonha".

Catalonia Open Doors se harà deth 23 ath 26 d'abriu en diuèrsi endrets des comarques gironines. I aurà charrades, visites e activitats descentralizades, ath delà d'ua trobada conjunta en Auditòri de Girona eth dia 24. Tant es interessadi en vier de dehòra coma es que vòlguen acuelher-les se pòden inscríuer en aguest web, a on tanben i trobaràn mès informacion a prepaus deth projècte.