Benvenguda

Laura Foraster, Secretària generau deth Conselh de Diplomacia Publica de Catalonha

Benvengudi e benvengudes en DIPLOCAT, un consòrci publicoprivat que, d'ençà der an 2012, trabalhe entà hèr a conéisher es valors e actius de Catalonha entre era opinion publica internacionau, hèr qu'eth nòste país age votz enes grani debats globaus e establir ligams de hidança damb era ciutadanetat e es institucions de d'auti païsi, ath delà de fomentar era capacitacion dera joenesa interessada enes relacions internacionaus e es professionaus que trabalhen en aguest camp.

Eretèr deth Patronat Catalunya Món (2007) e deth Patronat Català Pro Europa (1982), un organisme precursor enes relacions damb era UE, DIPLOCAT exercís eth doble prètzhèt d'apropar Catalonha entath mon e eth mon entà Catalonha.

Eth caractèr consorciau de DIPLOCAT, damb ua composicion diuèrsa e transversau, lo convertís en esturment d'acompanhament apropiat de toti aqueri actors dera societat civiu de Catalonha qu'an vocacion d'implicar-se e participar enes fòrums internacionaus.

En plea èra digitau, es empreses, es universitats, es viles e es organismes locaus, es movements sociaus e era madeisha ciutadanetat an cada viatge un ròtle mès important en governament globau d'un mon interconnectat. Conscient d'aguesta naua realitat, DIPLOCAT arremasse ua grana pluralitat de votzes e desplegue es airines mès diuèrses de projeccion entà apropar era societat civiu e es institucions deth país entar exterior e contribuïr, d'aguesta manèra, a arténher es desfisi que Catalonha s'a mercat.

Era projeccion dera imatge de Catalonha e era generacion d'ua opinion publica positiva en estrangèr an conseqüéncies dirèctes ena capacitat d'atraccion d'inversions, coneishença, institucions e persones, ath temps que contribuïssen a connectar, crear ligams e consolidar relacions d'amistat e hidança damb era rèsta deth mon. DIPLOCAT qu'ei, donc, ua institucion ath servici deth país, un esturment de preséncia en mon entà poder participar enes grani debats globaus, entà garantir en tot moment era pluralitat e era transversalitat.

Vos convidi a recórrer es diferentes seccions deth web entà descorbir damb mès detalh coma, en DIPLOCAT, connectam, projectam, abilitam entà promòir eth dialòg internacionau.

Laura Foraster i Lloret

Secretària generau de DIPLOCAT
secretariageneral(ELIMINAR)@diplocat.cat

Darrèra actualizacion: 06/05/2021

DIPLOCAT exercís eth doble prètzhèt d’apropar Catalonha entath mon e eth mon entà Catalonha.

Laura Foraster i Lloret (Barcelona, 1976) ei licenciada en Administracion e Direccion d'Empreses pera UPF e en Umanitats pera UOC e a un mastèr en Estudis Europèus hèt ena Universitat KU Leuven, ath delà de formacion especifica en diplomàcia publica e en missions d'observacion electorau. Deth 2012 ath 2018 siguec era directora executiva de DIPLOCAT e, preliminarament, auie exercit coma cap de Cabinet deth conselhèr de Comèrç, Torisme e Consum (2003-2006) e d'Innovacion, Universitats e Empresa (2006- 2010). Abans d'aguestes foncions, que trabalhèc en Brussèlles, en tot desvolopar diferenti trabalhs ena Comission Europèa, en Comitat des Regions, ena Delegacion deth Govèrn dera Generalitat de Catalonha deuant era Union Europèa e en Parlament Europèu. Ei secretària generau de DIPLOCAT dempús deth 17 de deseme deth 2018.

Mès informacion sobri Laura Foraster i Lloret