Mission e objectius

En relacions internacionaus, eth tèrme diplomacia publica definís er ensem d'accions de comunicacion adreçades as publics internacionaus damb er objectiu d'establir-i un dialòg e, en darrèr tèrme, influïr positivaments sus era imatge qu'an de nosati. Aguest qu'ei eth motiu d'èster deth Conselh de Diplomacia Publica de Catalonha, un consòrci publicoprivat qu'a coma objectiu connectar Catalonha damb eth mon e promòir activitats que projècten era imatge deth país tar exterior, en tot crear ligams e relacions de hidança damb era ciutadanetat e es institucions de d'auti païsi.

Eth Conselh tanben encoratge ara societat civiu e as entitats catalanes a implicar-se e contribuïr enes principaus desfisi e debats globaus e estimule era sua capacitacion entà èster un actor important ena scèna internacionau, tà establir pònts de dialòg durables en temps, damb intencion d'escotar e èster escotadi. Se Catalonha vò vier un actor internacionau de prumèr orde, ei capitau qu'es institucions e collectivitats deth país poguen aportar eth sòn punt de vista ara ora de bastir ua societat internacionau mès justa, pacifica, democratica e durabla.

Es activitats deth Conselh includissen quauqu'ues des practiques abituaus dera diplomacia publica ena esfèra internacionau: d'escambis de bones practiques enquia iniciatives de diplomacia digitau, debats academics, programes de visitaires o contactes damb premsa. Ath delà, eth Conselh trabalhe tà refortir es capacitats en relacions internacionaus des ciutadans, des collectivitats e des administracions de Catalonha, en tot autrejar borses e organizant corsi de formacion, ath madeish temps que les encoratge a èster actius enes principaus iniciatives de governança globau.

Documents

Darrèra actualizacion: 27/04/2020

Eth nòste objectiu ei connectar Catalonha damb eth mon e promòir activitats que projècten era imatge deth país tar exterior, en tot crear ligams e relacions de hidança damb era ciutadanetat e es institucions de d'auti païsi.