Organizat conjuntament per DIPLOCAT e era Delegacion deth Govèrn enes Païsi Nordics e Païsi Baltics, i participen 12 persones

DIPLOCAT e era Delegacion deth Govèrn enes Païsi Nordics e es Païsi Baltics an organizat un programa de visites deth 18 ath 21 de seteme en Estocolm e era region de Västerbottens Län, en nòrd de Suècia. Er objectiu ei conéisher de prumèra man experiéncies innovadores en airau dera atencion sociosanitària e er emplec de naues tecnologies entà facilitar-ne era practica en lòcs aluenhadi o de dificil accès.

Eth programa deth viatge inclodís visites a espitaus, centres de medecina rurau e projèctes de telemedicina, e trobades e entrevistes damb responsables de politica sanitària, expèrts tecnologics e personau medicau, entre d'auti.

Eth grop de 12 persones que participen en viatge ei format per representants de diferents entitats membres de DIPLOCAT, coma era Associacion Catalana de Municipis, eth Conselh Generau d'Aran, es deputacions de Girona e Tarragona, era Taula deth Tresau Sector Sociau de Catalunya e era Generalitat de Catalunya, mejançant eth Departament de Salut e eth de Drets Sociaus. Tanben i prenen part era secretaria generau de DIPLOCAT, Laura Foraster i Lloret, e era delegada deth Govèrn enes Païsi Nordics e Païsi Baltics, Montserrat Riba.

Damb aguesta activitat, DIPLOCAT incentive er estudi e escambi de modèls de bones practiques internacionaus que poguen èster importants entara atencion sociosanitària en Catalunya en zònes aluenhades o pòc poblades, en tot contribusir d'aguesta manèra a facilitar er equilibri territoriau e era luta contra eth despoblament.